பிறந்த நாள் வாழ்த்துகள்

பறவை பறப்பதை மறக்கலாம்,
ரோஜா பூப்பதை மறக்கலாம்,
ஏன் பூமி
சுற்றுவதைக் கூட மறக்கலாம்..,
ஆனால் ...,
உன், பிறந்த நாளை
எப்படி என்னால் மறக்க முடியும்??!!!...,
ஏனெனில்...,

திருவாசகத்தின் ஆறு வரிகளில்.. அண்டப் பகுதியின் உண்டை

திருவாசகத்தின் ஆறு வரிகளில்......

திருவாசகத்தின் ஆறு வரிகளில் அண்டம் விரிகிறது!
ம.செந்தமிழன்

‘அண்டப் பகுதியின் உண்டைப் பிறக்கம்
அளப்பரும் தன்மை வளப்பெரும் காட்சி
ஒன்றனுக்கொன்று நின்றெழில் பகரின்
நூற்றொரு கோடியின் மேற்பட விரிந்தன
இன்னுழைக் கதிரின் துன்அணுப் புரைய
சிறியோனாகப் பெரியோன் தெரியின்’ என்பது திருவாசகம்.

’அண்டமாகிய இந்தப் பிரபஞ்சத்தின் காட்சியை விளக்குவதென்றால், இங்கே உள்ள பொருட்கள் எல்லாம் ஒன்றோடு ஒன்று இணைந்திருந்து அழகுற திகழ்கின்றன. இவற்றின் எண்ணிக்கையோ நூறு கோடிகளுக்கும் மேற்பட்டது. இந்த எண்ணிக்கையும் நிலையாக இருப்பதில்லை அவை விரிந்துகொண்டே செல்கின்றன. இது எப்படி இருக்கிறதென்றால், வீட்டுக் கூரையில் உள்ள சிறிய ஓட்டை வழியாக வெயில் நுழையும்போது, அந்த நீண்ட குழல் வடிவமான ஒளியில் பல கோடி தூசுத் துகள்கள் சுழலுமல்லவா! அதைப்போல அண்டம் முழுவதும் அணுத் துகள்களும் அவற்றாலான பெரும் பொருட்களும் எல்லை வகுக்கவே இயலாத வகையில் சுழல்கின்றன. இந்த அண்டத்தின் அணுக்களில் சிறியதாகத் தெரிபவன் யாரென்றால் யாவற்றுக்கும் பெரிதான இறைவன்’ – என்பது இப்பாடலின் கருத்து.

திருவாசகத்தில் மாணிக்கவாசகர் பாடிய இதே கருத்தைத்தான் நவீன அறிவியல் இப்போது செயற்கைக்கோள் உதவியுடனும் தொலைநோக்கிகள் துணையுடனும் முன்வைக்கிறது.

நவீன இயற்பியலின் அடிப்படைக் கொள்கைகள் இரண்டு. ஒன்று, பகுதிக் கோட்பாடு (quantum theory). மற்றொன்று, தொடர்புக் கோட்பாடு (relativity theory).

பகுதிக் கோட்பாட்டின் சாரம், ‘பிரபஞ்சத்தில் உள்ள பொருட்களில் ஒளி பயணித்துக் கொண்டுள்ளது. இந்த ஒளி இடைவிடாத அலைபோலப் பயணிப்பதில்லை.
ஏனெனில் ஒளி என்பது ஒரே கற்றையான பொருள் அல்ல. அது எண்ணற்ற துகள்களின் தொகுப்பு. ஒவ்வொரு ஒளித்துகளுக்கும் இடையில் இடைவெளி உள்ளது.

இவ்வாறு பகுதி பகுதியாக பயணிக்கும் ஒளிக் கற்றைகள் பொதுப் பார்வைக்கு ஒரே அலைபோலத் தெரிந்தாலும் உண்மையில் அவை தனித் தனித் துகள்கள்தான். எல்லாத் துகள்களுக்கும் இடையில் வெளி (space) உள்ளது. இந்த வெளி நிலையானது அல்ல, விரிந்துகொண்டே இருக்கிறது’

’இன்னுழைக் கதிரின் துன்அணுப் புரைய
சிறியோனாகப் பெரியோன் தெரியின்’ எனும் இரு வரிகள் மிக அழகாக இந்தக் கருத்தை வலியுறுத்துகின்றன.

‘வீட்டினுள் நுழையும் ஒளிக் கற்றையைப் பாருங்கள். அது பொதுத் தோற்றத்தில் ஒரே ஒளிக் கற்றைபோல் இருக்கும். ஆனால், அக்கற்றையின் உள்ளே எண்ணற்ற நுண் அணுத்திரள்கள் இருக்கின்றன. இதேபோல் அண்டம் முழுவதும் ஒளிக் கற்றையின் பயணம் நிகழ்கிறது. வீட்டில் விழும் ஒளிக் குழலில் நுண் துகள்கள் இருப்பதைப் போல அண்டத்தில் பெரிய கோள்களும் பிற பொருட்களும் உள்ளன. இறைவன் பெரியவன். ஆனாலும் அவனைச் சிறியோனாகவும் காண இயலும். எப்படி என்றால், வீட்டுக் கூரையிலிருந்து கசியும் ஒளியில் துகள்கள் மிதப்பதும், அண்டத்தில் பெரும் பொருட்கள் மிதப்பதும் ஒரே விதமாக இருக்கிறதல்லவா. அதைப் போல இறைவன் சிறியதாகவும் பெரியதாகவும் இருக்கிறான்’

தொடர்புக் கோட்பாடு என்பது, ’அண்டத்தில் உள்ள பொருட்களைத் தனித்தனியே புரிந்துகொள்வதும் மதிப்பிடுவதும் சாத்தியமற்றது. அதாவது, பூமி எவ்வளவு வேகமாக சுழல்கிறது என்பதை, பூமியை மட்டுமே ஆய்வு செய்து கூறிவிட இயலாது.அவ்வாறு கூறினால் அது உண்மைக்குப் புறம்பானதாக இருக்கும். ஏனெனில் பூமியின் வேகம் சூரியக் குடும்பத்தில் உள்ள பிற கோள்களால் கட்டுப்படுத்தப்படுகிறது. சூரியக் குடும்பத்தின் இயக்கம் பால்வெளியின் இயக்கத்தைச் சார்ந்துள்ளது. பால்வெளியின் இயக்கமோ அண்டத்தின் கோடிக் கணக்கான பகுதிகளைச் சார்ந்துள்ளது. இவ்வாறு ஒன்றோடு ஒன்று சார்ந்தும் தனித்தும் உள்ளன. இவை எல்லாவற்றையும் தாங்கிக் கொண்டுள்ள வெளி (space) எப்போதும் விரிவடைந்துகொண்டே இருக்கிறது. அதாவது, எல்லாப் பொருட்களுக்கும் ஆதாரமாக இருக்கும் வெளி, நிலையாக இல்லாமல் விரிந்துகொண்டே உள்ளது. ஆகவே, பிரபஞ்சத்தை மதிப்பிடுவது துல்லியமான (absolute) செயலாக ஒருபோதும் இருக்காது. மாறாக, ஒன்றுக்கு ஒன்று ஒப்பிட்டுக் கூறுவதே சாத்தியம். இவ்வாறு ஒன்றோடு மற்றொன்று கொண்டுள்ள தொடர்புகளை அடிப்படையாகக் கொண்டு மதிப்பிடுவதால், இதன் பெயர் தொடர்புக் கோட்பாடு’

” அண்டப் பகுதியின் உண்டைப் பிறக்கம்
அளப்பரும் தன்மை வளப்பெரும் காட்சி
ஒன்றனுக்கொன்று நின்றெழில் பகரின்
நூற்றொரு கோடியின் மேற்பட விரிந்தன” என்ற வாசகங்களுக்கு வேறு எந்தப் பொருளும் இல்லை.

நேரடியாகவே பின்வரும் செய்திகளைத் தாங்கியுள்ளன இவ்வாசகங்கள்:
1. அண்டம் என்பது ஒன்றல்ல, பல்வேறு பகுதிகளை அடக்கியது. ஆகவே ’அண்டப் பகுதி’ எனப்பட்டது.

2. ’உண்டை’ எனும் சொல்லுக்கு ‘உருண்டை, கூட்டம்’ உள்ளிட்ட பொருட்கள் உண்டு. உருண்டை வடிவமான கூட்டம் என்பதை உண்டை எனலாம்.

3. ‘பிறக்கம்’ எனும் சொல்லுக்கு, ‘ஒளி, உயர்ச்சி, குவியல்’ ஆகிய அர்த்தங்கள் உள்ளன.

4. ஆக, ‘அண்டப் பகுதியின் உண்டைப் பிறக்கம்’ என்றால், ”எண்ணற்ற அளவில் உள்ள அண்டத்தின் ஒரு பகுதி, உருண்டை வடிவத்தில் கூட்டம் கூட்டமாக, ஒளிக் குவியலாக உள்ளது” என்று அர்த்தம்.

5. இந்தக் காட்சியைக் காணும்போது, அது அளவிடுவதற்கே இயலாததாகவும் மேன்மை பொருந்திய காட்சியாகவும் (வளப்பரும் காட்சி) உள்ளது.

6. ’ ஒன்றனுக்கொன்று நின்றெழில் பகரின்
நூற்றொரு கோடியின் மேற்பட விரிந்தன’ என்றால், பின்வரும் பொருள் கொண்ட வாசகம், ’இந்த அண்டப் பகுதியின் பொருட்கள் யாவும் தனித்தனியாக இருப்பதில்லை. ஒன்றுக்கு ஒன்று பொருந்துமாறு நின்றுகொண்டுள்ளன. இதன் அழகை விவரிப்பதானால்...அவை நிலையாக நில்லாமல் நூற்றுக் கணக்கான கோடிகள் எனும் எண்ணிக்கையில் விரிந்துகொண்டுள்ளன’

மேற்கண்ட விளக்கங்களில் ஒரே ஒரு சொல்லைக் கூட மிகைப்படுத்தி நான் எழுதவில்லை. திருவாசகத்தில் உள்ள பொருள் மாறாமல் நேரடியாக விளக்கியுள்ளேன்.

திருவாசகம் இயற்றப்பட்டு ஏறத்தாழ ஆயிரத்து முன்னூறு ஆண்டுகள் கடந்துவிட்டன. இப்பாடல் உள்ள பதிகத்திற்கு ‘திருவண்டப் பகுதி’ எனப் பெயரிட்டுள்ளார் மாணிக்கவாசகர். அதாவது, பெருமைமிகுந்த அண்டத்தைப் பற்றிய பகுதி என்று பொருள். பிரபஞ்சத்தை ‘திரு’ எனும் அடைமொழியால் அழைக்கும் பணிவு திருவாசகத்தின் சிறப்புகளில் ஒன்று.

திருவாசகத்தை ஆங்கிலத்தில் மொழிபெயர்த்த ஜி.யூ.போப் திருவண்டப் பகுதி எனும் சொல்லை, ‘Nature and Development of the Universe’ என்று மொழி பெயர்த்துள்ளார். ‘பிரபஞ்சத்தின் இயல்பும் வளர்ச்சியும்’ என்று இதற்குப் பொருள். ஏனெனில், திருவண்டப்பகுதி இந்தப் பிரபஞ்சத்தைப் பற்றிய நுட்பமான விளக்கங்களை உள்ளடக்கியுள்ளது.

தமிழர்களின் அறிவியல் மரபிற்கும் இறையியல் மரபிற்குமான சிறந்த உறவை ஏற்படுத்திய பெருமை திருவாசகத்திற்கு உண்டு. எல்லாவற்றிற்கும் மேலாக, இறையாற்றலை ஓர் உருவத்திற்குள் அடக்காமல் உணர்ந்த பெருஞ்சிறப்பும் மாணிக்கவாசகருக்கு உண்டு.

இறையை நோக்கி ‘ஆக்கம் அளவு இறுதி இல்லாய்’ என்றவர் அவர். ’உனக்கென ஒரு வடிவமும் அளவும் முடிவும் இல்லை’ என்பது இதன் கருத்து. ‘ஆணாகி பெண்ணாகி அலியாகி’ நின்றாய் என்றும் இறையைப் பாடியவர் மாணிக்கவாசகர்.
சமயங்களுக்கு அப்பாற்பட்ட பேருண்மைகளைத் தாங்கியுள்ள மந்திரத் தொகுப்பாக திருவாசகத்தைக் காண்கிறேன் நான்.

படித்ததில் பிடித்தது -15: நம்பிக்கைபலிக்கும்

15: நம்பிக்கைபலிக்கும்

நம் வாழ்வில் அ ஃபர்மேஷன் வாக்கியங்களின் மூலம் வியக்கத் தகுந்த மாற்றங்களை ஏற்படுத்த முடியும். கிட்டத்தட்ட மாயாஜாலம் என்றுசொல்லுமளவுக்கு அந்த மாற்றங்கள்இருக்கவும்கூடும். அதற்கு ஒரு உதாரணத்தைப் பார்ப்போம்.

உடல் நலமும் தொழில் நலமும்

ஓசூரில் ஒரு பெரிய தொழிற்சாலையில் நிர்வாகத்துக்கும் தொழிலாளிகளுக்கும் இணக்கமில்லாத சூழலில் ஒரு பயிற்சி வகுப்பு நடத்த வேண்டியிருந்தது. தொழிற்சங்கத்துக்கு இந்த வகுப்பில் நம்பிக்கையில்லை. இந்த வகுப்பை எப்படிக்கொண்டுபோவது என்று மனிதவளத் துறைக்கும் புரியவில்லை.

நிர்வாகத்தினரிடம் “முதல் வகுப்பில் சங்க நிர்வாகிகள் மட்டும் உட்காரட்டும். நிர்வாகத்தைச் சேர்ந்த யாரும் இரண்டு நாட்களுக்கு வர வேண்டாம். இந்தப் பயிற்சி பயன் தரும் என்று சங்கத்தினர் சொன்னால் மற்றவர்களுக்குத் தொடரலாம்” என்று நான் சொன்னேன். எனது யோசனை ஏற்றுக்கொள்ளப்பட்டது. ஒரு பள்ளிக்கூடத்தில் இந்தப் பயிற்சி வகுப்பைத் தொடங்கினேன்.

வந்திருந்தவர்களின் உடல் நலப் பாதிப்புகளுக்கான அஃபர்மேஷன் வாக்கியங்களைத் தமிழில் முதல் முறையாகக் கொடுத்தேன். எப்படிச் செயல்படுகிறது என்று அறிவியல்பூர்வமாக விளக்கி அவர்களின் தொழிலகத்தின் உறவுச் சிக்கல் வரை இதில் தீர்க்க முடியும் என்று புரிய வைத்தேன். சங்கம் பரிந்துரைத்ததால் எல்லாத் தொழிலாளிகளும் பயிற்சி வகுப்பில் கலந்துகொண்டார்கள்.

மாதக் கணக்கில் இழுபறியாக இருந்த சிக்கல் தீர்ந்தது. அந்தத் தொழிலாளர் குடியிருப்பில் அஃபர்மேஷன் அவ்வளவு பிரபலமானது. இந்த அனுபவத்துக்குப் பிறகுதான் தேவைப்படும் எல்லா இடங்களிலும் இந்த முறையை முழுவதுமாகப் பயன்படுத்த ஆரம்பித்தேன்!

கடிகளும் எண்ணங்களும்

ஒரு வகுப்பில் இருந்தவருக்குப் பூச்சிக்கடியால் கைகளில் தடிப்பு தடிப்பாக வீக்கம் இருந்தது. “நீங்கள்தான் எல்லாவற்றையும் நாம் கவர்கிறோம் என்று சொல்வீர்களே? இப்போது அஃபர்மேஷன் முறையில் இவரைச் சரிப்படுத்துங்கள்” என்று சவால் விடுவதுபோல, அவருக்குப் பக்கத்தில் இருப்பவர் கேட்டார்.

விஷக்கடிகள் பற்றியும் அவற்றைக் கவரும் உள்மனச் சிந்தனைகளையும் உணர்வுகளையும் பற்றி நான் அதிகம் அறிந்திராத காலகட்டம் அது. எனினும் இந்த அணுகுமுறையின் அடிப்படை அம்சங்களில் எனக்கு உறுதியான நம்பிக்கை இருந்தது.

“எனக்கு ஏன் என்று தெரியவில்லை. ஆனால், நீங்கள் அனைவரும் சென்ற பாதையில் இவர் ஒருத்தருக்கு மட்டும் இது ஏற்பட்டுள்ளது என்றால் நிச்சயம் இவர் இதைக் கவர்ந்துள்ளார். இது எதனால் என்று தெரியாவிட்டாலும் ஒரு பொதுப்படையான வாக்கியம் மூலம் இதைச் சரிசெய்ய முயலலாம்!” என்றேன். “பூச்சிக்கடிக்குக் காரணமான என் எண்ணங்களையும் உணர்வுகளையும் நான் முற்றிலுமாக வெளியேற்றுகிறேன்!” என்று ஒரு பக்கம் முழுதும் எழுதச் சொன்னேன்.

முழு நம்பிக்கையுடன் மனப்பூர்வமாக இதை எழுதினால் அதற்கான பலன்களை அடையலாம் என்பதுதானே அஃபர்மேஷன் வாக்கியங்களின் வலிமை?

எழுதியவரின் கைகளில் இருந்த தடிப்புகள் மெல்ல நீங்கின. அவருக்கும் அதைப் பார்த்துக் கொண்டிருந்தவர்களுக்கும் ஆச்சரியம் தாங்கவில்லை.

“பாம்பு கடிச்சா இது போல எழுதினா சரியாகுமா?” என்று குறும்பாகக் கேட்டார் அதே நண்பர்.

“நான் பயன்படுத்தவில்லை. ஆனால், கடிபட்டவருக்கு பாடம் போட்டு மந்திரம் சொல்லி விஷம் இறக்கும் ஆட்கள் இன்றும் கிராமங்களில் உள்ளனர். அவர்களின் வழிமுறைகளும் உடலைத் தாண்டிய மருத்துவம்தானே?” என்றேன் நான்.

நான் சொல்ல வருவது மந்திர சக்தி பற்றி அல்ல. ஆழ்ந்த நம்பிக்கையுடன் அஃபர்மேஷன் வாக்கியங்களைச் சொல்லும்போது அங்கே நம் மனமே சிகிச்சைக்கான வேலைகளைச் செய்கிறது. மனதின் அளப்பரிய ஆற்றல்களில் ஒன்று அது. அதை வெளிக்கொணர உதவுவதே அஃபர்மேஷன் வாக்கியங்களின் வேலை.

ஆழ்மனத் தியானம், அஃபர்மேஷன் முறைகள், ஹிப்னாஸிஸ் போன்றவை அலோபதிக்கு எதிரானவை அல்ல. எனக்குத் தெரிந்து சில அலோபதி மருத்துவர்கள் இத்தகைய மாற்று சிகிச்சைகளைச் சிபாரிசு செய்வது உண்டு. உடலை மட்டும் குணப்படுத்த முயலாமல் மொத்த உயிரையும் குணப்படுத்த நினைப்பவை இந்த வழிமுறைகள்.

ஒரு தவறான எண்ணம்கூட அதன் பாதிப்பை உடலில் காட்டிவிடும். எது விதை என்று தெரியாமல் மரமாகி வளர்ந்து நிற்கும்போதுதான் அதைக் கட்டுப்படுத்த நினைக்கிறோம். இதனால் தான் இத்தனை நோய்கள், இத்தனை பிரச்சினைகள், இத்தனை சேதங்கள்!

நேர்மறை மனம்

ஒவ்வொரு வலியும் நமது தவறான சிந்தனை ஒன்றை நமக்குக் காட்டிக் கொடுக்கிறது. வலி ஞானத்துக்கு வழி செய்கிறது.

ஒவ்வொரு உடல் உபாதையையும் உள் நோக்கிப் புரிந்துகொண்டு அதன் விதையான சிந்தனையை எதிர்கொண்டால் தான் முழுமையாக அதிலிருந்து விடுபட முடியும். அதனால்தான் இன்று யோகாவையும் ஹிப்னாஸிஸ் போன்ற வழிமுறைகளையும் மெல்ல மெல்ல அனுசரணையாக அலோபதி மருத்துவமும் பார்க்க ஆரம்பித்துள்ளது.

அஃபர்மேஷன் முறை எந்த முறைக்கும் எதிரானது அல்ல. உங்கள் மனதை நேர்மறையாகத் திருப்பும் முயற்சி. அவ்வளவுதான்.

விடை உங்களுக்குள்ளே

பல நோய்களுக்கான காரணம் மனதில்தான் உள்ளது. மனதின் கோளாறு உடல் கோளாறாக வெளிப்பட முடியும்.

தீராத மூல நோயால் அறுவைச் சிகிச்சைவரை சென்ற பெண்மணி தன் நோயின் உளவியல் காரணம் புரிந்து அஃபர்மேஷன் முறையில் பயிற்சி எடுத்தபோது மருத்துவர்கள் வியக்கும் வண்ணம் பூரணமான சுகம் பெற்றார்.

மூட்டு வலியை இனி ஒன்றும் செய்ய முடியாது என்று ஒரு தலைமைச் செயல் அதிகாரி நினைத்தார். தன் பெற்றோர்களுக்கும் தனக்குமான உறவு முறைதான் அந்த வலிக்கான காரணம் என்று தெரிந்துகொண்டார். அதன் பிறகு அஃப்ர்மேஷன் மூலம் மீண்டும் ஓட முடியும் அளவுக்கு குணமானார்.

அளவில்லாத கடன் சுமையில் இருந்தவர் ஒரு வருடத்தில் தன் நிதிநிலையைச் சீர் செய்தார். தன் எண்ணங்களால்தான் அத்தனை நஷ்டமும் என்று புரிந்ததும், அவர் அஃபர்மேஷன் எழுத ஆரம்பித்தார். எழுதும்போதே நிலைமை சரியாவதை உணர்ந்தார்.

விவாகரத்து வரை சென்ற தம்பதியினர் தங்கள் நிலைக்குக் காரணம் பொதுவான ஒரு எண்ணம்தான் எனப் புரிந்துகொண்டு அதை அஃப்ர்மேஷனில் மாற்றி ஒன்று சேர்ந்தனர்.

நிறைய நிஜ நிகழ்வுகள் ஆழ் மன அற்புதச் சக்தியை நமக்கு உணர்த்துகின்றன. உங்கள் பிரச்சினைக்கான விடை உங்கள் பிரச்சினைகளுக்குள்ளேதான் ஒளிந்துள்ளது. வெளியே இல்லை. அதை வெளிக்கொண்டுவந்து அதன் திசையை மாற்றும் அற்புத வழிமுறை தான் அஃபர்மேஷன் முறை.

நம்பினார் கெடுவதில்லை என்பது சத்திய வாக்கு. அந்த நம்பிக்கை ஆண்டவன் மீது இருந்தாலும் சரி. அல்லது அந்த ஆண்டவனே உங்களுக்குள்தான் என்று நினைத்து உங்களையே நம்பினாலும் சரி. நம்பிக்கை பலிக்கும்!

படித்ததில் பிடித்தது -14: எல்லாம் நன்மைக்கே!

14: எல்லாம் நன்மைக்கே!

என் வாழ்வில் அஃபர்மேஷன் முறை முதன் முறையில் பெரிதாக உதவியதே ஒரு சுவாரசியமான கதை. பத்து வருடங்களுக்கு முன் நிகழ்ந்தது அது.

புதிதாகக் கட்டிக்கொண்டிருந்த அடுக்கு மாடிக் குடியிருப்பில் ஒன்றை பதிவு செய்தேன். தங்கியிருந்த வாடகை வீட்டில் சொல்லி விட்டு புதுமனைப் புகுவிழாவுக்கு பத்திரிகை அடித்தபோதுதான் எனக்கு அந்தச் செய்தி தெரிந்தது.

நான் முன்பணம் கொடுத்திருந்த குடியிருப்புக்கு இன்னும் அரசு ஒப்புதல் வாங்கப்படவில்லை என்று. ஐந்து லட்ச ரூபாய் கொடுத்தாயிற்று. நான் தங்கியிருக்கும் வீட்டுக்கும் வேறு ஆளிடம் முன்பணம் வாங்கிவிட்டார் வீட்டு உரிமையாளர்.

யானை வாய் கரும்பு

அதனால், எது வந்தாலும் பார்த்துக் கொள்ளலாம் என்று நான் சொன்னதை என் அப்பா ஒப்புக்கொள்ளவில்லை. “முன்பணத்தைத் திருப்பிக் கேள், பதிவு செய்ததை ரத்துசெய், வேறு வீடு பார்!” என்றார். நான் தங்கியிருந்த வாடகை வீட்டின் சொந்தக்காரரோ கறாரானவர். இது தவிர, புதுமனைப் புகுவிழாவுக்கு ஊருக்கே தகவல் சொல்லிவிட்டேன். இன்னும் 3 வாரங்கள்தான் இருந்தன.

என் நண்பன் வேறு பயமுறுத்தினான். “ரியல் எஸ்டேட் பிஸினஸ்ல எல்லாம் பணம் கொடுத்தா யானை வாயில போன கரும்பு தான். எல்லா வேலையையும் விட்டுட்டு தினம் அந்தக் கட்டுமான நிறுவனத்துக்குப் போய் கண்டிப்புடன் பேசு. அலைஞ்சாத்தான் ஏதாவது தேறும்!” என்பான்.

மீண்ட கரும்பு

திக்குத் தெரியாமல் நின்றபோது எனக்கு ரெய்கி, மலர் மருத்துவம், அஃபர்மெஷன் எல்லாம் கற்றுத்தந்த ஆசிரியர் பாலகுமாரிடம் சென்றேன். “பயம் வேண்டாம். நம்பிக்கையோடு இதைச் சொல். போதும்” என்று ஒரு அஃபர்மேஷன் தந்தார்.

அதைச் சொல்லியபடி வண்டி ஓட்டிக்கொண்டு வந்தேன். நேராக வீட்டுக்காரரிடம் சென்று என் நிலையைச் சொன்னேன். அவரோ “ அந்த ஃப்ளாட் வேண்டாம். ரிஸ்க். பரவாயில்லை, நம் வீட்டிலேயே இருங்கள், அடுத்த வீடு கிடைத்து செட்டில் ஆகும் வரை!” என்றார். பாதி வெற்றி கிடைத்தது.

அடுத்த நாள் அந்தப் பெரிய கட்டுமானக் கம்பனியின் முதலாளியைப் பார்த்தேன். எனக்கு வீடு வேண்டாம் என்று கடிதம் கொடுத்தேன். முதலில் நெருக்கடியாகப் பேச ஆரம்பித்தவர், பின்னர் “10 ஆயிரம் ரூபாய் பிடித்தம் போக மிச்சப் பணம் உங்கள் ஃப்ளாட்டை அடுத்த ஆள் வாங்கும்போது தருகிறேன்” என்றார். நானும் அதோடு விட்டு விட்டு மற்ற வீடுகளைப் பார்த்தேன். அவர் சொன்ன தொகை காசோலையாக வீட்டுக்கு வந்திருந்தது. நம்ப முடியவில்லை. ஆனந்தத்தில் ஸ்தம்பித்துப்போனோம்.

மாறு!  மாறும்!

கதை இன்னும் முடியவில்லை. அடுத்த வாரமே நண்பரைப் பார்க்கப் போகும்போது வழி மாறி நந்தனத்தில் சுற்றியபோது முடிந்த நிலையில் ஒரே ஒரு ஃப்ளாட் நல்ல விலைக்குத் தயாராக இருந்ததைப் பார்த்தேன். குறைந்த விலையில் நல்ல சூழலில் இருந்தது. உடனே முடித்து விட்டோம். சொன்ன நாளில் புதுமனை புகுந்தோம். அனைத்தும் சுபமாக முடிந்தன.

எனக்கு அவர் சொன்ன அஃபர்மேஷன் இது தான். I trust the process of life. (நான் வாழ்க்கையின் வழிமுறையை நம்புகிறேன்!)

என் சந்தேகமும் பயமும் பதற்றமும் என்னை விட்டு விலகின. என் நம்பிக்கையும் அமைதியும் எதிராளிகளைப் பாதித்திருக்கின்றன. வீட்டுக்காரர் சிரமம் பார்க்காமல் உதவினார். அதே போல, கட்டுமான நிறுவன உரிமையாளரும் என் நியாயத்தையும் நம்பிக்கையையும் உணர்ந்து, அவர் சொன்ன தொகையை (நான் பலமுறை பேசவேண்டிய அவசியம் இல்லாமல்) காசோலையை வீட்டுக்கே அனுப்பி வைத்தார்.

எல்லாம் நன்மைக்கே என்ற அடிப்படையிலான என் ஆழ்மன மாறுதல்கள், என் உடல் நிலை, மன நிலை, என் பேச்சு, என் முடிவு எடுக்கும் திறன், எதிராளியைக் கையாளும் திறன், நெருக்கடியைக் கையாளும்போது விலகாத அமைதி என்று சகலத்தையும் எனக்குள் மாற்றியிருந்தன. அதன் சிறு வெளிப்பாடுகள் தான் புற உலகின் மாற்றங்கள்.

இது நடந்தபோது பலர் பலவிதமாக இந்த நிகழ்வைப் புரிந்துகொண்டார்கள். நான் புரிந்துகொண்டது ஒன்றே ஒன்றைத்தான். நாம் மாறினால் நம்மைச் சுற்றியுள்ள சூழல் மாறும்!

சங்கிலிப் பின்னல்

பிறகு, ஒவ்வொரு உடல் வலிக்கும் வாழ்வின் சிக்கல்களுக்கும் இந்த நேர்மறை வாக்கியங்களின் வழிமுறைகளைப் பின்பற்றி பல வெற்றிகள் கண்டிருக்கிறேன். என்னை விடப் பிறருக்கு அதிகமாக வெற்றிகள் கொடுப்பது என்னை மிகவும் யோசிக்கவும் வைத்தது. இந்த வழிமுறை எந்த மனதுக்கு எப்படி வேலை செய்கிறது என்றெல்லாம் நிறைய ஆராய்ச்சிகள் செய்ய வைத்தது.

மொத்தத்தில் சிந்தனை- உணர்வு- உடல் நிலை- செயல்- விளைவுகள் எனும் சங்கிலி எவ்வளவு பலமாகப் பின்னப்பட்டிருக்கிறது என்பதைப் புரிந்துகொண்டேன்.

அற்புதங்கள் என்பது என்ன? நம்ப முடியாதவை நடக்கும்போது அவற்றை அற்புதங்கள் என்று கூறுகிறோம். அப்படிப் பார்த்தால் “முடியாது” என்று இருந்த நிலை உங்களாலேயே நம்ப முடியாத தருணத்தில் “முடியும்” என்று மாறினால்? அது தான் அற்புதம்!

ஆன்மிகமும் அறிவியலும்

உங்கள் தர்க்க அறிவை விட மிகவும் சக்தி வாய்ந்த உள்ளுணர்வு சக்தி ஆழ்மனதுக்கு இந்தச் சிந்தனைகளைக் கொண்டு செல்கிறது. அதன் தாக்கம் உங்களுக்குள்ளும் வெளியிலும் மெல்லப் பரவும்.

இது அறிவியலா அல்லது ஆன்மிகமா என்று சிலர் கேட்பர். நான் கூறுகின்ற விஷயங்களில் அடிப்பகுதி ஆன்மிகம். மேல் பகுதி அறிவியல்.

மருத்துவத்துக்கும் ஆன்மிகத்துக்கும் இடையில் உளவியல் துறை பயணிப்பதால் இரு பக்கத் தாக்கங்களும் என்றும் அதற்கு உண்டு!

உங்கள் மனதைக் கூர்ந்து நோக்குங்கள். அதன் செயல்பாடுகள்தான் உங்கள் வாழ்க்கையில் சகலத்தையும் தீர்மானிப்பவை!

படித்ததில் பிடித்தது--- மனஅடிமையை வேலை வாங்குங்கள்

மனஅடிமையை வேலை வாங்குங்கள்

எதிர்மறை எண்ணங்கள் நோய்களையும் பிரச்சினைகளையும் உண்டாக்குவது உண்மை என்றால் நேர்மறை எண்ணங்கள் அதைச் சரி செய்யும் சக்தி கொண்டவை.

 

பலர் என்னிடம் “நான் பணக்காரன் ஆவேன். நான் பெரிய ஆள் ஆவேன்” என்றெல்லாம் சொல்லிப் பார்த்தேன், ஒரு பயனும் இல்லை” என்பார்கள். நேர்மறை எண்ணங்களுக்கான பயிற்சியிலும் பலருக்கு வெற்றி கிடைக்காததன் காரணத்தையும் பிறகுதான் நான் தெரிந்துகொண்டேன்.

 

மூன்று விதிகள்

 

அஃபர்மேஷன் என்பதை நேர்மறை சுய வாக்கியங்கள் எனலாம். அவற்றை அமைக்க மூன்று அடிப்படையான விதிகள் உள்ளன:

 

1.“நான்” அல்லது “என்” என்று தன்னிலை அவசியம் இருக்க வேண்டும்.

 

2. நேர்மறை வினைச்சொல் ஒன்றோ அதற்கு மேலோ இருக்க வேண்டும். “ஏற்றுக்கொண்டு”, “உறுதிகொண்டு” என்பதைப் போல.

 

3. முக்கியமான விதி: நிகழ்காலத்தில் அமைய வேண்டும். “இருக்கிறேன்”, “செய்கிறேன்”, “ஆகிறேன்” என்று முடிய வேண்டும்.

 

சரி, உங்கள் வாழ்க்கையின் முதல் அஃபர்மேஷனை எழுதுங்கள். வலது கைக்காரர்கள் என்றால் இடது கையாலும், இடது கைக்காரர்கள் என்றால் வலது கையாலும் எழுதுங்கள். உங்கள் ஆழ்மனப் பதிவுக்கு இது உதவும்.

 

“நான் என்னை விரும்பி ஏற்றுக்கொள்கிறேன்!”

 

இதில் மூன்று விதிகளும் கடைப் பிடிக்கப்பட்டுள்ளதைப் பாருங்கள்.

 

நொடியில் செயல்

 

“நான் எனும்போது செயலும் பொறுப்பும் உங்களுடையது என்பதை மனம் புரிந்துகொள்ளும். விரும்புதல் மற்றும் ஏற்றுக்கொள்ளுதலில்தான் நேர்மறைச் செயல்பாடுகள் நடக்கின்றன. தன்னை நிந்திப்பதையும், தான் நினைத்ததை எண்ணி வருந்துவதையும் இந்தச் செயல்பாடுகள் நேரடியாகக் கையாள்கின்றன.

 

முக்கியமான விதி நிகழ்காலத்தில் உள்ளது. “ஏற்றுக்கொள்கிறேன்” எனும்போது நிகழ வேண்டிய காலம் இந்த நொடி என்பதை உணர்ந்து உங்கள் ஆழ் மனது அதற்கு இசைந்து கொடுக்கிறது. இந்த வாக்கியத்தைச் சொன்ன நொடியே செயல்பாடு தொடங்கிவிடுகிறது.

 

பணக்காரன் ஆவேன் என்றால் எதிர்காலம். அது post dated cheque போல. நல்லது. ஆனால், உடனே செய்ய எதுவுமில்லை என்று உணர்ந்து மனம் இந்த செயல்பாட்டைத் தள்ளிப் போடுகிறது. இதனால், பணக்காரன் ஆவேன் ஆவேன் என்று சொல்பவர்கள் தொடர்ந்து சொல்லிக்கொண்டிருக்கிறார்கள்.ஆனால், பணக்காரர்கள் ஆவதில்லை.

 

வருமா,வராதா?

 

நெப்போலியன் ஹில்லும் இதைத்தான் சொல்கிறார். “நான் பண வரவைத் தொடர்ந்து பெற்று வருகிறேன்” என்றால் அது நல்ல அஃப்ர்மேஷன் எனலாம். காரணம் பண வரவுக்கான வேலையை, பணத்தைக் கவரும் வேலையை, பண வரவை முடக்கும் சிந்தனையை எதிர்க்கும் வேலையை உங்கள் ஆழ்மனம் உடனே செய்ய ஆரம்பிக்கிறது.

 

தொடர்ந்து சொன்னால் பணம் வருமா என்ற சிந்தனை வருகிறதா? இதை புரட்டிப் போட்டு யோசிக்கலாம். முதலில் பணம் தொலைத்தவர்கள் எல்லாரிடமும் ஒரு பொதுச் சிந்தனை இருக்கும். அது பணம் பற்றிய ஏதோ ஒரு முரணான, தவறான சிந்தனை. அது தொடர்ந்து பேச்சிலும் செயலிலும் தொடரும்.

 

“நம்ம ராசிங்க. சாண் ஏறுனா முழம் சறுக்கும்.” “நமக்குன்னு ஏதாவது ஒண்ணு கரக்டா வந்து சொதப்பிடும்”. “பணம் வந்தா நிம்மதி போயிடும். நான் இப்ப நிம்மதியா இருக்கேன்”. “பணம் வரும், போகும். அதுவா முக்கியம்?”

 

இப்படி இறுகிய எண்ணங்களைத் தொடர்ந்து வைத்திருக்கும்போது அவை தவறான முடிவுகளையும் தவறான சூழ்நிலைகளையும் கவர்ந்து இழுத்து வரும்.

 

நடக்கும், நடக்காது

 

வாரன் ப்ஃபே உலகின் தலை சிறந்த முதலீட்டாளர். தன் முழு வாழ்க்கையையும் முதலீடு செய்வதையே முழு நேரத் தொழிலாகச் செய்தவர். மிக அழகாக ஒரு உளவியல் கூற்றைப் போகிற போக்கில் சொல்கிறார். தவறான முதலீட்டு முடிவுகளை எடுப்பவர்கள் பயம், பேராசை என்கிற இரண்டு எதிர்மறை உணர்வுகளால் அத்தகைய முடிவுகளை எடுக்கிறார்கள்.

 

இது போல ஆராய்ந்தால் எல்லாப் பிரச்சினைகளுக்கும் விதை ஒரு சில அடிப்படையான சிந்தனைகளும் உணர்வுகளும்தான். அஃபர்மேஷன் முறையில் இரண்டையும் திருப்ப முடியும். “ஹூம்.. இதெல்லாம் இனிமே சொல்லி என்னத்தை செய்ய.. இதெல்லாம் நடக்காது !” என்று நினைத்தால் உங்கள் ஆழ்மனம் அதை அப்படியே ஏற்று அஃபர்மேஷனுக்கு எதிராக வேலை செய்யும்.

 

அனாயாசமான தாண்டல்

 

“என்னால் முடிகிறது”, “என்னால் முடியாது” என்று இரண்டு வாக்கியங்களில் எந்த ஒன்றையும் உணர்வுபூர்வமாக நம்பிச் சொல்லும் போது அது பலிக்கிறது. அதனால் தான் ஒரே வேலையை, ஒரே சவாலை இரண்டு பேர் முயலும்போது ஒருவரால் செய்ய முடிகிறது. இன்னொருவரால் செய்ய முடியாது. மனம் ஒரு அடிமை. உங்கள் நம்பிக்கைக்கு ஏற்ப அது செயல்படும்.

 

ஆறு அடி தாண்ட முடியுமா என்று கேட்டால் ‘கஷ்டம்தான்’ என்று பதில் வரும். தாண்டிப்பார்த்தால்கூட முடியாது. ஆனால், இரவில் ஒரு நாய் துரத்துகையில் அதே ஆறு அடி அளவுள்ள பள்ளத்தை “தப்பிக்கிறேன், தாண்டுகிறேன்” என்று எண்ணங்கள் தருகிற வலிமையில் அனாயாசமாகத் தாண்டுவீர்கள்.

 

சாதாரண மனிதர்கள் அசாதாரண செயல்களைச் செய்வது இந்த நம்பிக்கையில்தான். உங்கள் பிரச்சினைகளை எழுதுங்கள். வாக்கியங்களைப் படித்து அதில் உள்ள எதிர்மறைச் சிந்தனையை நேர்மறை சுய வாக்கியங்களாக மூன்று விதிகளை நினைவில் வைத்துக்கொண்டு மாற்றி எழுதுங்கள். அவற்றை ஒரு வாரம் மந்திரம்போல ஜபித்து வாருங்களேன்.

 

மாற்றத்தை நீங்களே உணர்வீர்கள்!

படித்ததில் பிடித்தது--- சந்தோஷப்படு! சந்தோஷப்படுத்துவாய்!

மனசு போல வாழ்க்கை- 16: சந்தோஷப்படு! சந்தோஷப்படுத்துவாய்!

டாக்டர். ஆர். கார்த்திகேயன்

 
 
 

Published : 07 Jul 2015 11:55 IST

Updated : 07 Jul 2015 11:55 IST

நம் எண்ணம்தான் பேச்சைத் தீர்மானிக்கிறது. பேச்சும் செயலும்தான் வாழ்க்கையைத் தீர்மானிக்கின்றன. இது உலகம் ஒப்புக்கொள்ளும் உண்மை.

வாழ்க்கையை மாற்றுவதற்கு பேச்சும் செயலும் மாற வேண்டும் என்றால் முதலில் எண்ணம் மாற வேண்டும். எப்படி மாற்றுவது என்று சொல்லித்தருவதுதான் அஃபர்மேஷன் முறை.

தமிழர்கள் மத்தியில் லூயிஸ் ஹேயையும் அஃபர்மேஷனையும் கொண்டுசேர்த்த திருப்தி, வந்து குவிந்த மின்னஞ்சல்களைக் கண்டதும் ஏற்பட்டது. தீராத வலி, பிடிவாதம் பிடிக்கும் மகன், மண முறிவு, கடன் தொல்லை, ஐ.ஏ.எஸ்.தேர்வில் வெற்றி, வேலை உயர்வு என எல்லாப் பிரச்சினைகளுக்கும் அஃபர்மேஷன் கேட்டு எழுதியிருந்தனர்.

நம் மனசு மாறினால் எல்லாம் மாறும் என்று நம்புகிறவர்கள் இத்தனை பேரா?

என்ன எழுத வேண்டும்? எத்தனை முறை எழுத வேண்டும்? மற்றவர்களுக்காக நான் எழுத முடியுமா? எல்லாருக்கும் வேலை செய்யுமா? இதனுடன் மற்ற சிகிச்சைகளை எடுத்துக்கொள்ளலாமா? எல்லா விஷயங்களுக்கும் இது உதவுமா? குடும்பத்தில் அனைவரும் எழுத முடியுமா? எந்தப் பிரச்சினைக்கு என்ன எழுத வேண்டும் என்று எப்படிக் கற்றுக்கொள்வது? என்று பல கேள்விகளை எழுப்பியுள்ளனர்.

மன நிலைகள்

அஃபர்மேஷன் என்பது நேர்மறை வாக்கியம். உங்களுக்குள் நீங்கள் பேசிக்கொள்ளும் உரையாடல் இது. ஆழ்மனதில் தர்க்கச் சிக்கல்கள் இல்லாமல் ஒரு தியானம் போலத் தொடர்ந்து ஒரு நேர்மறை எண்ணம் ஓதப்பட அது வலுப்பெறுகிறது. இது நாள் வரை பீடித்திருந்த எதிர்மறை எண்ணத்தின் தாக்கத்தைத் தகர்க்கிறது. வேரூன்றியிருக்கும் எதிர்மறை எண்ணத்தைப் பலவீனப்படுத்துகிறது. இவை அனைத்தும் சூட்சுமமாக அளவிட முடியாத வடிவில் நிகழ்கின்றன. அதனால்தான் இறுதியில் ஏற்படும் மாற்றம் மாயாஜாலம் போலத் தெரிகிறது!

இது தியானம், ஜபம், ஆழ்நிலை மனோவசியம் போலத்தான்! ருத்திராட்ச மாலை உருட்டும்போதும்,  ராம ஜெயம் எழுதும்போதும், கூட்டுப் பிரார்த்தனை செய்யும்போதும், மவுன விரதம், உண்ணா விரதம் இருக்கும்போதும், மனம் உருகிப் பிரார்த்திக்கும்போதும், தன்னிலை மறந்து இசையில், நடனத்தில், பக்தியில் கரையும் போதும், தன்னலம் கருதாச் சேவையில் உள்ள போதும் ஏற்படும் மனநிலைகள் அஃபர்மேஷன் எழுதும் போதும் ஏற்படும் மன நிலைக்கு ஒப்பானவை!

சுய அன்பு

லூயிஸ் ஹே போன்றவர்கள் எந்தப் பிரச்சினைக்கு, எந்த நோய்க்கு எதெல்லாம் ஆதாரச் சிந்தனைகள் என்பதை ஆராய்ந்திருக்கிறார்கள். அதன் அடிப்படையில் அஃபர்மேஷன்கள் அமைத்தார்கள். மொழி பேதமில்லாமல் இவை வேலை செய்தன. தவிர, இந்த வழிமுறையைப் பல பெயர்களில் பல யுத்திகளாகப் பிரபலப்படுத்தினார்கள் பலர். கவர்ச்சி விதி, மனக்காட்சி அமைத்தல், ஆழ் நிலை ஆலோசனை என்று பல பெயர்களில் பயன்படுத்தப்படுவது அஃபர்மேஷன் முறை தான்.

உங்கள் எண்ண ஓட்டத்தை அறிந்து, உறைந்து கிடக்கும் எதிர்மறை எண்ணங்களைக் கண்டுபிடித்து அதற்கேற்ப நேர்மறை வாக்கியங்கள் அமைத்துக் கொடுப்பது அவசியம். மாற்றுக் கரத்தால் எழுதும்போது அதுவும் ஒரு தியான அனுபவமாகிறது. தவிர, உங்களை உள்நோக்கிப் பார்க்க வைக்கிறது. இப்படித்தான் வேலை செய்கிறது அஃபர்மேஷன்.

எல்லோருக்கும் பயன்படும் வாக்கியம் ஒன்றைக் கொடுங்கள் என்று என்னைக் கேட்டால் நான் பரிந்துரைப்பது இதைத்தான்:

“நான் என் மீது அன்பு செலுத்தி என்னை ஏற்றுக்கொள்கிறேன்!” (I love and accept myself ). என் பயிலரங்குகளில் இதை basic affirmation என்று குறிப்பிடக் காரணம் இது எல்லோருக்கும் தேவை. நீங்கள் முதன்முதலில் ஒரு அஃபர்மேஷன் எழுத வேண்டும் என்றால் இதிலிருந்து ஆரம்பியுங்கள்.

தன்னிறைவு, தன்னம்பிக்கை, உறவுகள் சீராகுதல், தலைவலியிலிருந்து நிவாரணம் எனப் பல நன்மைகள் அளிக்க வல்லது இது.

அன்பும் ஏற்றுக்கொள்ளுதலும்

நாம் நம் மீதும் பிறர் மீதும் செலுத்தும் வன்முறைக்கு ஆதாரமான காரணம் அன்பு பற்றாக்குறைதான். பிறரைக் குற்றம் சொல்வோர் முதலில் தங்களையே கடிந்துகொள்கின்றனர். குறைபட்ட சுய மதிப்பு உள்ளவர்கள்தான் பிறரின் மதிப்பைக் குறைத்து மதிப்பிடுவந்தனர். உள்ளே அவமானப்படும்போது பிறரை அவமானப்படுத்துவார்கள்.

பிறரை சந்தோஷமாக வைத்திருக்கத் தெரியாதவர் தன்னை முதலில் சந்தோஷமாக வைத்திருக்கத் தெரிந்திருக்க மாட்டார். பிறரின் தன்னம்பிக்கையை நசுக்குபவர்கள் தன்னம்பிக்கை குறைந்தவர்களாகத் தான் இருப்பர். ஆதலால், இந்த வாக்கியம் உங்களை நீங்கள் பரிவுடன் அன்புடன் நடத்த வழி செய்யும்.

ஏற்றுக்கொள்ளுதல்தான் உறவுகளின் சாரம். சொல்லப்போனால் வாழ்க்கையின் சாரம். நம் எதிர்பார்ப்புகளும் நிதர்சனங்களும் வேறுபடும்போதுதான் மனம் ஏமாற்றம் அடைகிறது. பின் எதிர்மறையான எல்லாக் குப்பைகளையும் உள்ளே கொட்ட ஆரம்பிக்கிறது. தன்னைச் சார்ந்த மனிதர்களையும் சூழலையும்கூடச் சீர் கெட வைக்கிறது. தன்னை விரும்பி ஏற்றுக்கொள்ளும் மனிதர் அடுத்த கட்ட உள்மனப் பரிமாணத்துக்குத் தயாராகிறார்.

அன்பும் ஏற்றுக்கொள்ளுதலும் கொண்ட வாழ்க்கையில் தோல்வியில்லை. ஏமாற்றமில்லை. இதைத் தர்க்கரீதியாகப் பேசிப் புரிய வைப்பதை விட இந்த ஆழ் நிலை சுய வாக்கியங்கள் அமைதியாக இந்த அற்புதத்தை நிகழ்த்துகின்றன.

90 சதவீதப் பிரச்சினைகள் நாமே ஏற்படுத்திக்கொண்டவை. வெளிக் காரணங்களால் ஏற்பட்ட மிச்சம் 10 சதவீதப் பிரச்சினைகளிலும் நம் முடிவுகள் சார்ந்துதான் அமைதியும் வெற்றியும் கிடைக்கின்றன.

குரங்கின் பிடி

ஆப்பிரிக்காவில் குரங்குகளைப் பிடிக்க ஒரு வழிமுறையைக் கையாளுவார்கள். அகன்ற அடித்தளமும் குறுகிய திறப்பும் கொண்ட கண்ணாடிக் குடுவையில் பாதிக்கு மேல் வேர்க்கடலையைக் கொட்டி வைப்பார்களாம். கடலை தின்னும் ஆசையில் கையை உள்ளே குறுக்கிவிட்டுக் கடலையை அள்ளியவுடன் முஷ்டி பெருத்துக் கையை வெளியே எடுக்க முடியாமல் போகும்.

கையில் உள்ள கடலையைக் கொட்டி விட்டால் கையை எடுத்துவிடலாம். ஆனால் கடலை ஆசை தடுக்கும். கடலையோடு எவ்வளவு முயன்றாலும் வலிதான் மிஞ்சும். கடலையும் கிடைக்காது. கையும் வெளியே வராது. இப்படிச் சிக்கித் தவிக்கையில் வேட்டைக்காரர்கள் வந்து குரங்குகளைப் பிடித்துச் செல்வார்களாம்!

நம் வாழ்க்கையிலும் இப்படிக் கையை வைத்துவிட்டு, எடுக்க மனம் இல்லாமல் வலியோடும் நிராசையோடும் எத்தனை போராட்டங்களை இறுதி வரை நடத்துகிறோம்?

தொடர்புக்கு: gemba.karthikeyan@gmail.com

படித்தில் பிடித்தது 😇😇🍎🍎ஓடவும் முடியல, மோதவும் முடியலயே!

ஓடவும் முடியல, மோதவும் முடியலயே!

டாக்டர். ஆர். கார்த்திகேயன் 

எல்லோரும் மன அழுத்தம் என்பதை ஒரு நவீன விஷயமாகப் பேசுகிறார்கள். இது ஆதி மனிதனாக இருந்த காலத்திலேயே நமக்கெல்லாம் இருந்த விஷயம்தான். நம் பெரிய அண்ணன் சிம்பன்ஸிகூட இதைப் பெரும்பாலும் அனுபவித்தவர்தான். ஒன்றும் புதிதில்லை. அப்படி என்றால் ஏன் தற்போது இவ்வளவு கூச்சல்? காரணம் உள்ளது. அதை விவாதிக்கும் முன், ஒரு சின்ன ‘ஃப்ளாஷ் பேக்’. சில ஆயிரம் ஆண்டுகளுக்கு முன்னால் ஒரு அதிகாலைப் பொழுது.

குகையிலிருந்து ஆதி மனிதன் சோம்பலாய் வெளியே வருகிறான். எதிரில் வைத்தகண் வாங்காமல் ஒரு புலி உற்று நோக்கிக் கொண்டிருக்கிறது. ஆபத்தை உணர்ந்த ஒரு நொடியில் முடிவு செய்கிறான். ஒன்று சண்டையிட வேண்டும். அல்லது ஓடி விட வேண்டும். இந்த எண்ணம் வந்த அதே நொடியில் உடல் சக்தியைத் திரட்டுகிறது. சண்டையிட வேண்டுமானாலும் சரி, ஓட வேண்டுமானாலும் சரி, உடல் ஒத்துழைக்க வேண்டும்.

அதற்குக் கண் பார்வை கூர்மையாக வேண்டும். தசைகள் முறுக்கேற வேண்டும். தோல் தன்மை மாற வேண்டும். இதயம் அதிகமாகத் துடிக்க வேண்டும். இவை அனைத்தையும் நரம்பு மண்டலம் செய்து மனதுக்கு சிக்னல் கொடுக்க வேண்டும். பிறகு மனம் ஆபத்தை ஆராய்ந்து புலி குட்டியாக இருந்தால் சண்டைக்குச் சென்று விரட்டவோ கொல்லவோ முடிவு செய்யும். பெரிய புலியென்றால் உயிரைக் காக்க மைல்கணக்கில் அத்தனை தடைகளையும் தாண்டி மர உச்சியிலோ சிறு குகையிலோ பதுங்க ஓட வேண்டும்.

“யெஸ் சார்!” இதை Fight or Flight Response என்பார்கள். ஒரு நெருக்கடி நிலையை உணர்ந்து உடல் ரசாயன மாற்றங்கள் செய்துகொள்ளுதலைத்தான் Stress Response என்று பின்னர் அழைக்க ஆரம்பித்தனர். இதில் முக்கிய விஷயம் என்னவென்றால், இது மிகக் குறுகிய காலம் மட்டுமே உடலுக்கு நிகழும் மாற்றமாக இருந்தது. காரணம், புலி விரட்டப்பட்டவுடனோ புலிக்குத் தப்பிய பிறகோ உடல் பழையபடி தளர்வு நிலைக்கு உடனே திரும்பும். தசைகள் தளரும். தோல் சகஜ நிலைக்கு வரும். இதயத் துடிப்பு சீராகும். மனம் நிவாரணம் கண்டவுடன் பசி எடுக்கும். உறக்கம் வரும். மீண்டும் இயல்பு வாழ்க்கை திரும்பும்.

இங்குதான் நவீன வாழ்வில் சிக்கல் உள்ளது. இங்கு நெருக்கடிகள் பெரும்பாலும் உள்ளம் சார்ந்தவை. உடல்ரீதியான நெருக்கடி, உயிர் பயம் போன்றவை விலகியவுடன் இயல்புநிலை திரும்பும். ஆனால், உளச் சிக்கல்கள் நீடித்து நிலைப்பவை. எப்படி? உங்கள் பாஸ் அனைவர் முன்னிலையிலும் மிக மோசமாக நீங்கள் செய்த வேலை குறித்துக் குறை கூறுகிறார். கடுமையான வார்த்தைகள் சொல்லித் திட்டுகிறார். உடல் உடனே அதே ‘ஃபைட்- ஃப்ளைட் மோடு’க்குச் செல்லும். இதயம் துடிக்கும். ஜீரணம் தடைபடும். தசைகள் முறுக்கேறும். ஆனால், உங்களால் அங்குச் சண்டையும் போட முடியாது. ஓடிப்போகவும் முடியாது. அனைத்தையும் விழுங்கிக்கொண்டு “யெஸ் சார்!” என்று வேலையைத் தொடர் வேண்டும்.

உடலும் மனமும்

வீட்டிலும் இதே நிலைதான். தகாத சொற்களும், தர்க்கமில்லாச் சண்டைகளும் போடும் வாழ்க்கை. துணையிடமிருந்து ஓடிப் போகவும் முடியாது. எல்லா நேரத்திலும் சண்டை போடவும் முடியாது. இது தவிர, சமூகத்தில் காணும் ஒவ்வொரு நெருக்கடிக்கும் உடல் ஒரே விதமாகத்தான் எதிர்வினையாற்றுகிறது. பல இடங்களில் ஒன்றும் செய்ய முடியாமல் அந்த உணர்விலேயே பல மணி நேரம் தங்கிவிடுகிறோம். இயல்புநிலைக்குத் திரும்ப முடியாமல் நீடித்த மன உளைச்சல் நோய்களைக் கொண்டுவந்து குவிக்கிறது.

புலியை எதிர்கொண்ட ஆதிமனிதன் ஓடியோ சண்டையிட்டோ மன அழுத்தம் தந்த ரசாயனங்கள் சீர்பட உடல் உழைப்பைப் பயன்படுத்தினான். அன்று மன அழுத்தம் பற்றிய அறிவு அவனுக்கு இல்லை. ஆனால், அவன் வாழ்க்கை முறை அதைச் செய்ய வைத்தது. இன்று உடல் பயிற்சி பற்றி அனைத்தையும் படிக்கிறோம். ஆனால், அனைத்துக் காரியங்களையும் நடத்த இயந்திரங்களைக் கண்டுபிடித்துவிட்டோம். செய்கின்ற வேலைகளையும் ரோபோட்க்கள் பறிக்கச் சம்மதம் தெரிவித்துவருகிறோம்.

அதனால் ஒவ்வொரு மன உளைச்சல் தரும் சம்பவமும் உடலில் நோய்களாகும்வரை தங்கிவிடுகிறது. இதுதான் நவீன காலப் பிரச்சினை. அன்று அவனுக்கு உணவு பற்றிய கவலையும் உயிர் பற்றிய பயமும் மட்டும்தான் முக்கியமான மன அழுத்தம் தரும் காரணிகள். இன்று கண் விழித்தவுடனேயே பாஸ் முகம், ஈ.எம்.ஐ., கிரெடிட் கார்ட் பாக்கித் தொகை, தத்கல் டிக்கெட், முதுகு வலி, வாட்ஸ் அப் வதந்திகள் என மனம் சிதற, ஒவ்வொரு நெருக்கடி உணர்வும் உடலில் அமிலம் சுரக்க வைக்கிறது. மன அழுத்தங்களை உடல் உழைப்பால் சரி செய்யும் சூட்சுமம் அறிந்திருந்தான் ஆதி மனிதன். நாம் மனதுக்கும் உடலுக்கும் உள்ள தொடர்பை உள்ளே தேடாமல் மாத்திரை, மருந்துகள், இயந்திரங்கள் பொருட்கள், உறவுகள் என வெளியே தேடிக்கொண்டிருக்கிறோம்!

கேள்வி: என் வயது 35.  எனக்குத் தூக்கம் குறைந்துகொண்டே வருகிறது. மூன்று மணி நேரம்கூட இரவில் தூங்க முடிவதில்லை. மாத்திரை எடுக்கப் பயமாக இருக்கிறது. இரவைக் கடத்துவது எப்படி என்று தெரியவில்லை. மொபைல் பார்த்துக் களைப்பானாலும் தூக்கம் வருவதில்லை. தனியே வசிக்கிறேன். கணவர் அபுதாபியில் உள்ளார். தனிமையால்தான் தூக்கம் வரவில்லையா,  என்ன சிகிச்சை எடுப்பது?

பதில்: பசியும் தூக்கமும் ஆரோக்கியத்தின் அறிகுறிகள். உடலோ மனமோ எந்தப் பாதிப்பை எதிர்கொண்டாலும் அது இவ்விரண்டில்தான்  முதலில் வெளிப்படும். இன்று அமெரிக்காவில் தூக்கத்துக்கும் துக்கத்துக்கும் கொடுக்கப்படும் மாத்திரைகளே அதிகமாக விற்கப்படுகின்றன.
ஒரு மருத்துவரைப் பாருங்கள். உடல் அல்லது மனநோய் இல்லாத பட்சத்தில் இது வாழ்வியல் பிரச்சினை. தனிமை ஏதாவது ஒரு திரையைப் போதையாக்கிக் கொள்ளும். டி.வி. அல்லது மொபைல். இன்று பெரும்பாலும் மொபைல். இதை Electronic Screen Syndrome என்று சொல்கிறார்கள். 10 மணிக்கு மொபைலைச் செயலிழக்கச்செய்துவிட்டு நிசப்தமும் இருளும் சூழ்ந்த அறையில் உறங்கச் செல்லுங்கள். தூக்கம் வராவிட்டாலும் பரவாயில்லை. அந்தத் தொடர் ஓய்வு தூக்கத்துக்கு இட்டுச்செல்லும்.